TaigiKeyboard 台語齒盤

台語齒盤是一个自由、開源的台語拍字家私，拍字引擎由台灣人家己開發，照台語的拍字習慣設計。會當用白話字、教育部台羅佮方音符號拍字。 台語齒盤永遠免費、無廣告，嘛袂推出付費功能。毋管是一般使用者、先生、學校抑是台語教育團體，攏會當自由使用。希望予逐家用台語、教台語的時，免有額外的負擔。 ► 特色 • 3 種拍法：白話字、台羅、方音符號。 • 3 種顯示：漢羅對應、漢羅濫、羅馬字。 • 5 種佈局：PhahTaigi、Lohankha、教育部佈局 1、教育部佈局 2、方音符號齒盤。 • 辭典開關：8 本辭典＋5 種補充資料。 • 主題色水：21 款內建主題，嘛會使家己配色、用相片做背景。 • 5 種字型：系統、粉圓、芫荽、源樣明體、源樣烏體。 • 自訂詞庫：訂做家己的詞庫。 ► 隱私第一 • 單純拍字，無複雜的功能 • 無連網路，袂共你的內容送去別位 • 資料攏儉佇你的手機仔內底 •「完整取用」干焦用來佮 App 共用設定，無連網路 ► 詞庫 教育部用字 •《教育部臺灣台語常用詞辭典》（含 10 種腔口） •《公視台語台台語新詞辭庫》 •《國立臺灣工藝研究發展中心台語工藝詞庫》 •《教育部學科術語臺灣台語對譯》 其他詞庫 •《臺日大辭典台語譯本》 •《iTaigi 愛台語》 •《台灣植物名彙》 •《台華線頂對照典》 補充資料 • 異用字 • 在來字 • 腔口差 • 李江却台語文教基金會漢羅合用建議用字 • 詞庫增補檔案