Eko Faol Fuqaro

About Eko Faol Fuqaro

"Eko faol fuqaro" – bu O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi tomonidan ishlab chiqilgan ekologik faoliyatni rag‘batlantirishga qaratilgan raqamli platformadir. Ilova orqali har bir fuqaro o‘z ekologik odatlari va kundalik faoliyatini baholaydi hamda "eko faol fuqaro" maqomini olish imkoniyatiga ega bo‘ladi.

Ushbu maqomni olish uchun foydalanuvchi bir sutkada 10 ming yoki undan ko‘proq qadam yurishi, daraxt ekishi, uyi uchun quyosh panellarini o‘rnatishi, ortiqcha vaznini kamaytirishi, chiqindilarni to‘g‘ri ajratishi, plastik iste’molini qisqartirishi, shaxsiy avtomobilini elektromobilga almashtirishi yoki jamoat transportidan foydalanishi, energiyani tejovchi qurilmalardan foydalangan holda yashash tarzini o‘zgartirgani kabi mezonlarga javob berishi lozim. Shu bilan birga, ekologik tadbirlarda ishtirok etish, elektr, gaz va suv ta’minotini hisoblagichlar orqali nazorat qilish, uy fasadini issiqlikni saqlovchi materiallar bilan qoplash kabi ko‘rsatkichlar ham baholash tizimida hisobga olinadi.

“Eko faol fuqaro” maqomiga ega bo‘lganlarga bir nechta imtiyozlar taqdim etiladi. Davlat xizmatlaridan foydalanishda 10 foizgacha chegirma qo‘llaniladi, iste’mol kreditlarida foiz stavkasi 0,3 foizgacha kamaytiriladi. Shuningdek, ekologik transport vositalari – velosiped, skuter va boshqa vositalar sovg‘a tariqasida berilishi mumkin. Oila a’zolari to‘liq yashil maqomga ega bo‘lsa, ularga “yashil oila” maqomi beriladi va har yili lotereya asosida elektromobillar sovg‘a qilinadi.

Yana bir muhim jihat – agar mahallaning 50 foizdan ortiq aholisi “eko faol oila” maqomiga ega bo‘lsa, bu mahallaga “eko faol mahalla” maqomi beriladi. Ushbu maqom orqali chiqindi yig‘ish maydonchalari qurilishi, daraxt ekish va sug‘orish, ijtimoiy obyektlarga chiqindi konteynerlari o‘rnatish ishlari uchun 500 million so‘mgacha mablag‘ ajratiladi. Shahar yoki qishloq darajasida 50 foizdan ko‘proq mahallalar eko faol maqomiga ega bo‘lsa, “Yashil shahar” yoki “Yashil qishloq” maqomi belgilanadi.

Ilova orqali siz “Yashil kalkulyator” yordamida o‘z harakatlaringizni baholaysiz va shunga qarab ekologik maqomni qo‘lga kiritasiz. Ushbu tizim ekologik ongni oshirish, jamiyatda mas’uliyatli yashash tarzini shakllantirish va barqaror kelajakka yo‘l ochish maqsadini ko‘zlaydi.