Deftere Allah

About Deftere Allah

TINDINOOJE:
Deftere Allah (la Bible en adamawa fulfulde) hawti defte 66. Yimɓe feere feere mbinndi ɗe, ngam maajum ɗe peerotiri. Ammaa bee non fuu ɗe kawti ngam haa ɗe kolla yiide Allah waŋgannde yimɓe fuu bee Yeesu Almasiihu.
Alkawal Ɓooymawal woni yeɓre mawnde arannde. Nde ɗon anndina en habaru Allah bee yimɓe muuɗum Isra'iila'en. Nder Alkawal Ɓooymawal, Allah wolwani yimɓe bee kunnduɗe annabi'en. Annabi'en paamtini yimɓe no hakkeeji e aybeeji mbonni kawtal maɓɓe bee Allah, ɓe kolli ɓe laawol kisndam e jam, ɓe anndini ɓe boo haala kisnoowo mo Allah tammi nelugo.
Alkawal Ɓooymawal senndaama geɓe pamare feere feere. Tawreeta woodi defte jowi (5). Ɗe tinndini en no Allah tagri asama e duniyaaru bee yimɓe e ko woni ton fuu. Ɗe tinndini en Ilam Tuufaana. Ɗe tinndini en no Allah haɓɓiri alkawal bee Ibrahiima e danygol muuɗum. Kadiboo ɗe tinndini en no Isra'iila'en njooɗino haa Misra e no Allah hisni ɓe, wurtini ɓe ton, yahri ɓe haa lesdi Kanaana.
Defte Habaruuji ndokki en habaru yimɓe Isra'iila nder defte sappo e ɗiɗi (12). En njaŋngan nder maaje no Isra'iila'en nastiri Kanaana e ko laatani ɓe ton. En tawan habaru laamiiɓe maɓɓe mawɓe Daawuda e Suleymaanu e laamiiɓe woɗɓe, non boo haala daheeki maɓɓe haa lesdi Baabila e gartuki maɓɓe haa lesdi Yahudiya.
Woodi boo Defte Gime e Hikma. Ɗe ɗon jowi: Nder Jabuura en tawan gime maŋgtooje e gettooje, non boo do'aaje e tornde haa Allah ngam heɓugo ballal e aynol e kisndam e yaafuye e jaalorgal dow konne'en. Deftere Balndi waŋgini bolle hikmaaje.
Yeɓre Defte Annabi'en mari defte sappo e joweeɗiɗi (17). En njaŋngan ton no annabi'en ngaaziri Isra'iila'en bee innde Allah nder zamanuuji feere feereeji.
Alkawal Kesal woni yeɓre mawnde ɗiɗawre. Nde ɗon anndina en haala Yeesu Almasiihu. Bee maako Allah haɓɓiri alkawal kesal bee yimɓe duniyaaru fuu. Ɗume alkawal maajum wi'ata? Ɗum kubaruwol Allah ceynoowol no o hisnirta yimɓe bee Yeesu Almasiihu. Koo moy nuɗɗini Yeesu woni kisnoowo e Jawmiraawo mum, nasti nder alkawal maajum, heɓi boo ngeendam nduumiiɗam. Fakat, Alkawal Kesal naa ɗum haala anndal. Allah yiɗi neɗɗo jaɓa, hoolo ko winnda nder deftere nde'e, o tokko ɗum bee ɓernde woore.
Defte nayi aartuɗe mbi'ete Linjiila. Ɗe ɗon anndina en kuuɗe Yeesu Almasiihu diga danyeeki mum haa maayde mum e ummitineeki mum.
Kuuɗe Nelaaɓe ɗon tinndina en no nelaaɓe Yeesu Almasiihu njahri Linjiila diga Urusaliima haa Roma.
Bataakeeji Pol mbinndaama ngam wallugo nuɗɗinɓe hesɓe.
Bataakeeji goɗɗi mbinndanaama nuɗɗinɓe koo toy fuu malla haa nuɗɗinɓe haa nokkuuje kaja.
Wahayu Yuhanna ɗon tawe haa ragare Alkawal Kesal. Deftere nde'e nanndaay bee defte aartuɗe. Nde ɗon tinndina en jaalorgal laamu Allah e laamiiɗo mum Yeesu Almasiihu bee koyɗi e balndi ɗi caɗani en faamugo. Ammaa kubaruwol maare maŋngol saɗaay faamugo, ngol waŋgi nder Wahayu Yuhanna 11:15: «Laamu duniyaaru laatanake Jawmiraawo meeɗen e Almasiihu muuɗum, o laamoto haa abada abadin!»