Riyozus solihin sharhi

About Riyozus solihin sharhi

«Riyozus solihin» kitobi Islom olamining moʻtabar va mashhur olimlaridan imom, faqih, muhaddis, hofiz Abu Zakariyo Yahyo ibn Sharaf Navaviy qalamlariga mansub bo‘lib, o‘zining sahihligi, ishonarliligi, daqiqligi, Qurʼoni Karim va sunnati nabaviyya asosida mo‘min-musulmonlarni hidoyatga chorlash, iymonini yuksaltirish, axloqini o‘nglashda katta xizmati tufayli islomiy o‘lkalarda maʼlum va mashhur.

Bu mashhur asarni o‘zbek kitobxoniga tushunarli holda yetkazish umidida ustoz Anvar Ahmad bevosita arab tilidan o‘zbekchaga tarjima qildilar va ushbu kitobda kelgan har bir hadisni sharh va izoh bilan boyitdilar. Shuningdek, bu kitobni sharhlashda asosan alloma Shamsiddin Ahmad ibn Sulaymon ibn Kamol poshsho Rumiy Hanafiyning qalamiga mansub «Favoidul mutriʼatul hiyoz fiy sharhi kitabir riyoz» nomli kitobidan keng ko‘lamda foydalanildi. Hadislarning arabiy matnini tanlashda esa 2018-milodiy, 1439-hijriy sanada «Darul minhaj» nashriyoti tomonidan 7 ta qo‘lyozmaga muqobala (solishtirib) tayyorlangan kitobning nusxasi tanlandi. Xususan mazkur yettita nusxaning ichidagi qo‘lyozmalarning biri imom Navaviyning eng yaqin shogirdi Ibn Attorning qo‘lyozmasi bo‘lishi bu nusxa yana ham ishonchli ekaniga dalolat qiladi.