Зікір-дұғалар

About Зікір-дұғалар

بسم الله الرحمن الرحيم

МҰСЫЛМАН ҚОРҒАНЫ
Құран мен Сүннеттен алынған зікір-дұғалар
Жинақтаған: Аллаһ Тағалаға мұқтаж доктор Са’ид бин ‘Али бин Уаhф әл-Қахтани.
Бұл менің «Құран мен Сүннетте келген зікірлер, дұғалар және дем салып емдеу» атты кітабымның қысқартылған нұсқасы. Оны алып жүруге және сапарда қолдануға жеңіл болу үшін, мен «Зікірлер» атты тарауды ықшамдадым.
Бұл жерде мен зікірлердің мәтіндерін ғана, олардың бір немесе бірнеше дереккөздерімен бірге келтірумен шектелдім. Хадис қай сахабадан жеткізілетінін немесе басқа да нақтылықтарды білгісі келгендер осы кітаптың толық нұсқасына оралсын.
Мен Құдіретті әрі Ұлы Аллаһтан Оның көркем есімдері мен кемел сипаттары арқылы бұл кітаптың тек Оның ғана игілікті Дидарына арналған болуын, және маған тірі кезімде де, қайтыс болуымнан кейін де пайда беруін сұраймын. Мен сондай-ақ Аллаһтан бұл кітап оны оқитындарға, басып шығаратындарға және таралуына себепші болатындарға да пайда келтіруін тілеймін, расында, бұл барлық кемшіліктен Пәк болған Оған ғана тәуелді әрі Ол осыған құдіретті.
Аллаһ Тағалаға мұқтаж Са’ид бин ‘Али бин Уаhф әл-Қахтани.

Бұл қосымшаның артықшылығы онда әрбір зікір-дұғаға қатысты хадистер мен олардың сенімділігі көрсетілетіндігі.

Суфиян әс-Саури былай дейтін: «Иснад — бұл мүминнің қаруы! Әрі егер оның (қолында) осы қару болмаса, онда ол ненің көмегімен соғыспақ?!» (Қз. «Файдул-Қадир», 1/433).
Имам Ибн әл-Мубарак былай деген: «Иснад - діннен, әрі егер иснад болмағанда, онда әркім қалағанын айта берер еді!» (Муслим, 1/15).
Мухаммад ибн Сирин былай дейтін: «Бұрын, (ислам үмметінде) бүлік орын алмайынша, иснад туралы сұрамайтын. Ал ол орын алғаннан кейін: «Бізге жеткізушілеріңізді атап беріңіздерші», - деп айтатын болды. Әрі олар қарайтын: егер жеткізушілер әһли-Суннадан болса, онда олардың хадистерін қабылдайтын; ал егер олар бидғаттардың жақтаушыларынан болса, онда олардан хадистерді алмайтын!» (Муслим, 1/15).
Имам әш-Шәфи’и:«Иснадсыз хадис талап етуші түнде отын жинайтын адам секілді. Әрі ол өзінің (жинаған) отын бауының ішіне жылан кіріп кеткенін байқамай да қалады».
Қазақ тіліне орыс тілінен аударған: «Абу Ханифа мирасы» сайтының редакциясы